Marhata Sinamot 1

 PANDUAN ACARA

MARHATA SINAMOT

. . . .  . . . . . . . . . . . . . . . . .

 Dohot

                          . . . . . . . . . . . . . . . . . . . . . .

I. MANGARADE

1.        Paranak ro tu jabu ni parboru asa rap tu gereja

2.        Acara Martumpol di Gereja :

a.    Hata Huhuasi sian Parboru

b.    Hata Huhuasi sian Paranak

3.        Parboru, Dongan Tubu, Boru, Bere/Ibebere dohot Dongan Sahuta masuk tu Jabu/gedung

4.        Parboru Manjouhon Hulahula, Tulang dohot Tulang Rorobot (rap masuk ma)

5.        Parboru manjouhon uduran di Paranak (Paranak manjouhon udurannna ima Dongan Tubu, Boru, Bere/Ibebere, Dongan Sahuta, Hulahula, Tulang dohot Tulang Rorobot asa rap masuk)

II. PASAHAT TUDUTUDU SIPANGANON/DENGKE

1.       RP. Parboru

Dihamu amangboru, nungga boi hita mulai?

2.       RP. Paranak

Nauli Rajanami, jala mangarade ma hamu rajanami asa ro hami pasahat tudutudu ni sipanganon tu hamu rajanami, mauliate

3.       RP. Parboru

Mauliate amangboru, Tu hita namardongan tubu lumobi suhut mangarade ma hita.

4.       RP. Paranak

Dihamu borunami boan hamu tuson tudutudu ni sipanganon asa dipasahat tu rajai

5.       Paranak  Pasahat Tudutudu ni Sipanganon.

       (Suhut Paranak + Paidua Ni Suhut)

Dison huboan hami do tudutudu ni sipanganon, napinatupa ni parboruon-mu Rajanami, las ma rohamuna manjalo!.  

“Butong mangan na godang , mokmohan mangan na otik”

Sai pamurnasmai tu daging , saudara tubohi

Asa dohonongku ma ;

“Habang pidong halohalo, didongani pidong sitapi-tapi;

Tung las ma rohamuna manjalo, ai i dope natarpatupa hami”

Boti ma  Rajanami !!

6.       RP. Parboru

Dihamu borunami boan hamu tuson dengke nanaeng pasahaton tu horong ni amangboru dison.

7.        Parboru Parboru pasahat “ Dengke “

(Suhut Parboru + Paidua Ni Suhut)

Di hamu raja ni parboruon nami, dison ro do hami pasahathon:

·               Dengke simudur-udur tu hamu, Asa rap ma hamu,  mudur-udur diangka nauli dht na denggan tu joloan on.

·               Dengke saur do on tutu, Asa rap saur hamu matua sude parboruon  nami.

·               Dengke sahat do on huhut, Asa sahat ma tutu nauli   dht na denggan, di hamu parboruon nami, tumpahon ni amanta Pardenggan basa i.

Asa uli ma rohamu manjalo, songon nidok ni umpasa ma dohonon:

“Tubu simarhora-hora, di topi ni tapian;

Sai ro ma tu hamu las ni roha, tiur na pancarian”

Boti  ma.

HUHUASI tudu-2 ni sipanganon dohot dengke sian na dua bola pihak :

Parboru         :

Dihamu Amanta raja dohot inanta soripada, dongan tubu, dongn sahuta, boru lumobi ma di hamu hulahula dohot tulangnami, dison dijalo hami do tudutudu ni sipanganon  sian pamoruonnami,  nang pe holan hami na manjalo naung rap manjalo ma hita disi, Botima.

Paranak        :

Dihamu Amanta raja dohot inanta soripada, dongan tubu, dongan marpadan Silaban Sitio, dongan sahuta, boru lumobi ma di hamu hulahula dohot tulangnami, dison dijalo hami do dengke sian hulahulanami,  nang pe holan hami na manjalo naung rap manjalo ma hita disi, Botima.

8.       RP. Parboru

Ala hamu do naro mamboan sipanganon, sian hamu ma mambahen tangiang mangan amangboru..

9.       RP. Paranak

Mauliate Rajanami, nipasahat ma tu  . . . . . . . . . . . .  manguluhon tangiang mangan.

10.    RP. Paranak

Songon huhuasi ni sipangaanon DOHONON NAMI MA :

Sititi ma sihompa, golang-golangpangara-hutna. Tung so sadiape na hupatupa hami, sai godang ma pinasuna.

11.    RP. Parboru

Ala naung sun hita marsipanganon jumolo ma ditutup dohot  tangiang dung sidung mangan sian . . . . . . ...

III. MARHATA JAMBAR

1.        RP. NI PARBORU :

Hamu Parboruon nami, beha nungnga rade hamu? Asa ta uduti pangkataionta.

2.       PARANAK :

Nauli Rajanami, hita uduti ma ulaonta, mauliate

3.       RP. NI PARBORU

Dihita namardongan tubu, dongan sahuta dohot boru/berenami, lumobi ma dihamu hulahula rajai raja . . . . . . . . . . ., Tulang nami Rajai raja . . . . . . .  dohot Tulang Rorobot nami rajai raja . . . . . . . ., ala naeng mulaionta ma pangkataion hot ma hita dihundulanta, tiroi jala tuturi hamu hami molo beda pandapot, mauliate

4.       PARANAK :

Dihita namardongan tubu, dongan marpadan Silaban Sitio, dongan sahuta dohot boru/berenami, lumobi ma dihamu hulahulanami rajai raja . . . . . . . . .  dohot Tulangnami rajai raja . . . . . . . . . . dohot Tulang Rorobotnami rajai raja . . . . . . . ., ala naeng mulaionta ma pangkataion hot ma hita dihundulanta, tiroi jala tuturi hamu hami molo beda pandapot.

“Ompu Nibisuk Sabungan ni roha,

Hula-hula do sungkunon dibisuk, jala sidodo roha”

Botima rajanami.

5.       RP. NI PARBORU

Dihamu amangboru,  Andorang so manghatai hita, beha do taringot tu tudu-tudu ni sipanganon, parjolo ma tahatai partording ni parjambaron, Botima.

6.       RP. NI PARANAK

Mauliate Raja nami, toho do i.

Andorang so diseat raut jolo diseat hata, parjolo ma tutu tapahantus Parjambaran dohot Hasahatanna, hamu ma mangatur Rajanami, molo tung adong jambar taripar tu hami, “sidapot solup ma hami” , botima.

7.       RP. NI PARBORU

a.    Mauliate ma Amangboru, parjolo tahatai parjambaran, jala hami ma mangatur. Jala songon on ma partording ni parjambaran sesuai dohot konsep nami

·         Jambar di Hami (Parboru) ima :  ihur-ihur, 2 Soit, Na-marngingi siamun, ½ osang, ½ Aliang-aliang dohot Pohu/tanggo-tanggo.

·         Jambar Taripar tu hamu (Paranak) ima : 2 Soit, Na-marngingi hambirang, ½ Osang, ½ Aliang-aliang dohot pohu/tango-tanggo.

b.    Songoni ma konsep nami, boha pandapotmu Amangboru?

8.       RP. NI PARANAK

Nauli Rajanami.

9.       RP. NI PARBORU

Dihita na mardongan tubu, dongan sahuta, boru/berenami, lumobi ma dihamu hulahula dohot tulangnami, songon on ma nian konsep nami taringot tu Parjambaran ima :

·                    Jambar  tu hamu Hulahula nami Rajai, raja . . . . . . . . , ima  . . . . . . .

·                    Jambar tu hamu Hulahula namangamai (molo adong), rajai raja . . . . . . . . . ima . . . . . . .

·                    Jambar tu hamu Tulang nami rajai, raja . . . . . . . . . . ima . . . . . . . . .

·                    Jambar tu hamu Tulang Rorobot nami rajai, raja . . . . . . . .  ima . . . . . . . . . .

·                    Jambar tu Dongan Tubu  ima  . . . . . . . .

·                    Jambar tu Dongan Sahuta ima  . . . . . . . . .

·                    Jambar di hamu boru dohot bere/ibebere  ima . . . . . . . . . . . .

·                    Jambar tu Suhut ima . . . . . . . . .

·                    Jambar tu Pariban ni Suhut ima . . . . . . . . . .

·                    Jambar tu Pangula ni Huria  ima . . . . . . . . . . . .

Songoni ma konsep nami, dihamu Hulahula dohot Tulang nami, tiroi jala tuturi hamu hami, botima mauliate.

10.    Alus ni Hulahula / Tulang ni Parboru

Nungga denggan i amangboru, mauliate.

11.    RP. NI PARANAK

Dihita na mardongan tubu, dongan sahuta, boru/berenami, lumobi ma dihamu hulahula dohot tulangnami, ala adong do jambar taripar tu hita songon on ma nian konsep nami taringot tu Parjambaran ima :

·                    Jambar  tu hamu Hulahula nami Rajai, raja . . . . . . . . , ima  . . . . . . .

·                    Jambar tu hamu Hulahula namangamai (molo adong), rajai raja . . . . . . . . . ima . . . . . . .

·                    Jambar tu hamu Tulang nami rajai, raja . . . . . . . . . . ima . . . . . . . . .

·                    Jambar tu hamu Tulang Rorobot nami rajai, raja . . . . . . . .  ima . . . . . . . . . .

·                    Jambar tu Dongan Tubu  ima  . . . . . . . .

·                    Jambar tu Dongan Sahuta ima  . . . . . . . . .

·                    Jambar di hamu boru dohot bere/ibebere  ima . . . . . . . . . . . .

·                    Jambar tu Suhut ima . . . . . . . . .

·                    Jambar tu Pariban ni Suhut ima . . . . . . . . . .

·                    Jambar tu Pangula ni Huria  ima . . . . . . . . . . . .

Songoni ma konsep nami, dihamu Hulahula dohot Tulang nami, tiroi jala ajari hamu hami, botima mauliate.

12.    Alus ni Hulahula / Tulang ni Paranak

Nungga denggan i amangboru, mauliate.

13.    RP. NI PARBORU

Hamu Boru nami, hindat hamu ma tu dapur, togihon hamu boru ni Parboruonnami mangurupi, bagi hamu ma hombar tu adatta, nadia ma napatut jambar taripar tu Paranak.

IV. MARHATA SINAMOT

1.        RP. NI PARBORU

Mangkatai ma hita Amangboru! Sai jolo ni nangnang do ninna asa ni nungnung, sai jolo pinangan do, asa sinungkun’ Ba, nungnga hupangan hami antong sipanganon na binoanmunai, Jagar do bosur hami mangan indahan  na las, jagar  sagat marlompan juhut na tabo huhut sombu  minum aek sitio-tio, sai tu tiona ma angka pancamotan-parsaulian dihita, jadi :

“Dia ma nuaeng langkatna, dia ma unokna

Dia ma hatana, dia ma nidokna”

Dokkon hamu ma Amangboru.

2.        RP. NI PARANAK

Gabe ma jala horas,  Rajanami.

Taringot tu sipanganon i :

“Si Titti ma si hompa, golang-golang pangarahutna;  tung so sadia pe na hupatupa hami, Sai pamurnas mai tu daging, saudara tu bohi, sipalambok pusu-pusu ma i, Sipasindak panaili, sai godang ma pinasuna”

Sai manumpakma tondimuna Rajanami, marhitehite tangiangmuna di hami Parboruonmuna, sai lam tamba ma sinadongan di hami, asa tarpatupa hami dope  na tumabo na laho pasangaphon hamu hula-hula nami.

Jadi ianggo lapatan ni sipanganon i, Rajanami, ba,  Parhorasan-Panggabean,  do, botima, Rajanami !!.

3.        RP. NI PARBORU

Gabe ma tutu jala horas – Amangboru !.

Sai sahat ma hata nauli hata na denggan songon na nidokmuna i, tumpahon ni Amanta Debata, sai dapot ma nian songon hata ni umpasa :

 “Bona ni aek Puli, di dolok ni Sitapongan

Sai tubu ma di hamu angka nauli, jala sai lam tamba Pan-camotan”

Alai di hamu Amang Raja ni Ianakkon, sai marangkup do na uli, sai mardongan do na denggan. Jadi tung tangkas ma paboa laengku hinaroromuna tu bagasta on.

“Ranting ni bulu duri, jait masi-jaotan,

Siangkup ni hata na uli, dia ma nuaeng si-taringotan?”

Botima, Raja ni Boru!!

4.        RP. NI PARANAK

Olo Rajanami, toho do na nidokmuna i, Sai marangkup do na uli, sai mardongan do na denggan, Nuaeng pe paboaon ma tutu, siangkupna songon na hundul, sidonganna songon na mardalan.

Jumolo ma hami Raja nami marsomba ujung dohot jari-jari sampulu tu tuamuna dohot sahalamuna. Mauliate godang dohononnami tu hamu hula-hulanami, na ria manjangkon hami di bagasta na marsangap na martua on.

Taringot diharoronami Rajanami,  na adong do na solot di ate-ate nami, jala gompang di pusu-pusu, na naeng sombahonon nami tu hamu Raja nami. Alai tung molo adong annon hata na hurang manang na lobi, ba, anju hamu hami Rajanami :

 “Ampapaga dolok tu ampapaga humbang

Ba, hita do marsogot, laos hita do nang haduan”

Jadi songon on do Rajanami, Na ro do alu-alu ni anak nami si Parlin tu hami songon on : Diluahon patna ibana ninna, tu hutanta na uli on, huhut ma huroha jinou-jou huhut hiniap-niap ni rupa na uli dohot parulaon na denggan ni boru ni na gabe, boru ni na mauli-bulung hula-hulanami di huta on. Longang do rohanami umbege hatana, ai ianggo rohanami, nda tung leak adong boru ni halak na olo pangkulinganna. Hape Rajanami, didok ibana ma tu hami, disi mulak ibana sian huta on, jolma na martua do ibana, alana :

“Pitu lili na – pa-ualu jugian na,

Na uli do  nipi na – ai dijangkon borumu, ibana”

Ba, las roha antong huhut malambok pusu umbege i songon nidok ni umpasa:

“Tinampul bulung si-arum, bahen uram ni pora-pora

Na hansit gabe malum, molo dapot sinangkap ni roha”

Nuaeng pe Rajanami, ba nungnga dipasiat borumuna i anak nami, ba tung asi ma rohamuna Rajanami,  jangkon hamu ma anak nami i gabe helamuna, nian ianggo sian sibahenon do Rajanami ndada na barani hami mandapothon hamu, ala ni hapogoson, ai tung so adong do na boi pangasahonon nami. Alai nang pe songoni Rajanami, ianggo somba ni uhum do, sai na bahenon nami do olat ni na tarpatupa hami, jala pos do roha nami di hamu,  ndada ampehonon muna tu hami na so tarusung hami, botima.

5.        RP. NI PARBORU

Olo amangboru, las do rohanami umbege hatamuna i. Andorang so hualusi hami jolo husungkun hami jo borunami, dihamu borunami, sungkun hamu jo paribanmuna. (boi do dijou calon penganten)

6.        BORU NI PARBORU

Nungga husungkun hami paribannami, toho do ninna songon boa-boa ni Paranak, mauliate

7.        RP. NI PARBORU

Mauliate ma di borunami. Di Hamu amangboru, hami pe antong dipangido rohanami do, asa domu na marrongkap. Jadi taringot di berenami, ba nungnga na ulinon i, On pe lae, sai rongkap ni borunami ma bere i, rongkap na gabe, rongkap na mamora, rongkap na saurmatua. Ianggo taringot di siboanonmuna lae, laho palashon rohanami, on do dohononnami:

 “Ndang tuktuhan batu – Dakdahan Simbora,

Ndang tuturan Datu – Ajaran na Marroha”

“Na malo do hamu – sigodang boto-botoan,

Raja na bisuk do hamu – Ompu ni Parbinotoan”

Jadi nang didok hamu na so adong be di hamu, bangko ni hata do i sidohonon. Tangkas do tinanda hamu, jala tutu do na nidokmuna i, jadi binoto do ndada na paidua hamu di sinadongan, ai :

“Pat ni Gaja tu pat ni Hora,

Anak ni Raja do hamu – Pahompu ni Namora”

Asa hami pe, Lae, dohononnami do songon nidok ni bere i :

 “Pitu lili nami – paualuhon jugian

Uli do nipi nami – ai gohanmuna ma hajutnami”

On pe amangboru, Torop ma parade hamu angka dorbia i dohot sihumisik i, asa saur patupaon ni suhut nami tu pesta i, botima, Rajaniboru!!

8.        RP. NI PARANAK

Mauliate Rajanami, Raja ni hula-hula! Marsomba ujung hami, marsomba huhuasi tu tua dohot tu sahalamuna. Tutu do Rajanami, ianggo ala sangapmuna, na patut do hamu manjalo angka na ginoaranmuna ondeng. Jala tutu do nang na nidokmuna taringot tu hamoraon ni Ompunta na jolo, alai habis do i sudena laho pasingkolahon beremuna. Tung adong pe pasipasina nuaeng, ndada na tarhatahon be i, ai mampar do nuaeng sude i di Padang Bolak. Alai ala huboto hami ndada pola gulut di sinamot hamu hula-hulanami. Ido Rajanami, umbahen na barani hami mandapothon hamu. On pe Rajanami, sai unang paurak hamu hami di pogosnami on. Nungngai huroha pangidoan ni sibaran, ai :

“Sai tu ginjang ninna porda, sai tu toru do pambarbaran

Sai naeng mamora ninna roha, hape pogos do ninna sibaran”

Ai hami pe nian Rajanami, sai naeng do nian mangalehon na godang, asa sangap iba berengon ni dongan, ai sangap do na nialap, sangap na tinaruhon songon Silindung na uli. Alai hansit do tangan mandanggurhon na soada.

On pe Rajanami, asa jolo mangido pandapot jolo hami sian Boru dohot Dongan Tubu nami tarlumobi panuturion sian Hulahula dohot Tulangnami, lehon hami jo tingki dihami, mauliate.

9.        RP. NI PARBORU

Nauli amangboru.

10.     RP. NI PARANAK

Mauliate rajanami disaluhut uli dohot denggan ni basamunai, saonari mangido pandapot ma jo sian borunami, dongan sahutanami dohot sian dongan tubunami tarlumobi ma panuturion sian hulahula dohot tulangnami.

Dihamu borunami, hupasahat ma tu hamu tingki laho mangelekkon sinamot tu hulahulanami, asa sahali mangelengkon hita, botima.

11.     HATA SIAN BORU NI PARANAK

Hamu Rajanami, raja ni hulahula. Aturanna ma i andehonon ni hulahulanami  hata i tu hami ianakkonna,

Durung do tutu boru, tomburan hulahula;

Na ingkon do porsanon ni boru, napinorsan ni hulahula.

Jadi dohot pe hami borunasida ro tu bagasta na marampang na marjual on, na laho mangurupi nasida do. Alai, nungnga songon i jolo huroha pangalahona, ianggo di tingki on, gabe tarpaksa ingkon dohonon hata umpasa :

Ni Durung pora-pora, ala soada be sibahut,

Naeng mangurupi ninna roha, hape soada isi ni hajut.

Alai ahu, songon boru, tung mansai sangap do di ahu hulahula, tarlumobi songon hamu hulahula ni hulahula. Ala ni i tu hulahula ni hulahulangku dison hami songon boru mangelengkon asa sadiape sinamot na naeng pasahaton ni hulahula nami sian bariba on tu hamu las ma rohamuna manjalo jala molo boi sahali mangelengkon ma. Botima.

12.     RP. NI PARANAK

Mauliate dihamu borunami, saonari hupangido hami ma panuturion sian hamu dongan sahutanami.

13.     DONGAN SAHUTA NI PARANAK

Mauliate ala diandehon hamu hata i tu hami Dongan Sahutamuna. On do dohononnami, sai masipaolo-oloan ma hamu na dua bola pihak jala masipaune-unean, jala unang antong masipaujatan. Ingot hamu nidok ni umpasa :

Sambil na tartondong, dapotan ampa-paluan;

Asa denggan martondong, unang masipa-maluan

Olat ni na tarbahen sai na oloan do hulahula, songon hata ni umpasa :

Sinuan bulu, sibahen na las;

Sinuan partuturan, sibahen na horas

Asa parhorasan do na umporlu, ndada sinamot. Ba, asa dapot parhorasan,  taingot ma poda ni angka ompunta :

Dolok ni pangaloan, hatubuan ni hau toras;

Halak na masipa-oloan, i do na saut horas

On pe Raja ni Hulahula, manang na sadia annon godang ni sinamot na naeng sombahonon ni suhut nami oloi hamu ma  jala hami pe sapandapot ma sahali mangelengkon ma nian. Botima.

14.     RP. NI PARANAK

Mauliate ma dihamu dongan sahutanami, saonari sahat ma tu hita na mardongan tubu, urupi hamu hami laho mangelek hulahulanta taringot tu godang ni sinamot na naeng pasahatonta, botima.

15.     HATA DONGAN TUBU NI PARANAK

Hamu Rajanami, raja ni hula-hula. Na mangido ma hami dihaburjuon muna jala dilambas ni rohamuna maradophon hami parboruonmuna.

Ndada na so malo hami Rajanami mandok na godang, alai ndang tarpatupa songon nidok ni umpasa :

Niluluan tandok, hape dapot parindahanan;

Tolap pamangan do nian mandok, alai ndang tuk jamaon ni tangan.

Alai tung beha pe pogosnami Rajanami, sai na bahenonnami do somba ni uhum tu hamu. Ba, nang pe sahali mangelengkon hami di sinamot ndang pola na mangkolit hami.

Duri ni harangan, hatubuan ni tada-tada;

Hansit do tangan, Rajanami, mandanggurhon na soada.

Botima rajanami.

16.     RP. NI PARANAK

Mauliate ma dihamu dongan tubunami, saonari mangido panuturion ma hami tu hamu hulahula dohot tulangnami, tiroi jala tuturi hamu hami rajanami, botima.

17.     HATA SIAN HULA-HULA NI PARANAK

Mauliate, ala diiandehon hamu hata tu hami Hula-hula, Tulang dohot tulang rorobot muna. Laos tu hamu Parboruonnami  sandiri jumolo hata dohononnami. Tutu do songon nidok muna i, hansit do tangan mandanggurhon naso ada. Alai ingot hamu ma poda ni ompunta sijolo-jolo tubu :

Tuat Raja martua, marabit tigabolit

Anggo tu Hulahula, tung so boi do mangkolit.

Olat ni na tolapniba, ingkon las bahenon roha ni hulahula. Ndang sala nang mangutang iba anggo di tingki na pangolihon anak.

Jala tu hamu Raja Sinaga, dohonongku ma, ala naeng rap marboru hita tu Parboruonta na dison, ba gabe marampara na ma hita. Jadi Ampara, on ma dohonongku tu hamu:

Ndada ala ni gondangna, umbahen na ni-eahan

Ndada ala ni otikna, umbahen na tinadingkon.

Poda ni ompunta sijolo-jolo tubu :

Amporik mallipik, habang-habang tingki haleon

Na godang do na otik, asal ma ias roha mangalehon”

Angkup ni i, songon naung binegemuna nangkin hata ni Parboruonta sian on, Ba, hatangkon ma songon panimpuli ni elek-elek nasida. Manang sadia pe na naeng pasahaton ni parboruonta tu hamu songon Sinamot oloi amparangku ma.  Unang pola be hita marsitawaran. Sai sahat ma panggabean, sahat parhorasan di hita luhut.

Dihadengganhon Amparangku ma i :

Bona ni aek puli, di dolok ni Pangaloan

Saut ma hita dapotan uli, ala naung marsipaolo-oloan”

Botima, horas ma hita sude !!!

18.     RP. NI PARANAK

Mauliate ma dipanuturion sian hamu hulahula dohot tulangnami.

Dihamu rajanami, rajai Toga Sinaga nungnga tung marliat-liat hami mangalehon panuturion asa sahali mangelengkon ma hami di sinamot, boha ma pandapormuna raja nami?, botima.

19.     RP. NI PARBORU

Nauli amangboru, alai andorang so hualusi sungkun-sungkun munai, jolo hupangido jo pandapot sian borunami, dongan tubu, dongan sahuta tarlumobi panuturion sian hulahula dohot tulangnami. Dihamu borunami, dongantubunami, dongan sahutanami tarlumobi ma dihamu tulang dohot hulahulanami, dipangido amangborunami sian baribaan asa sahali mangelengkon nasida taringot tu sinamot,  boha pandapot muna, hupasahat ma parjolo tu borunami, mauliate.

20.     Hata sian  Boru ni Parboru

Mauliate ma dihamu hulahulanami,  ala diandehon hamu hata i tu hami Borumu.

Hamu, Raja Hutabarat, ala boru ni hula-hulanta on do hami, gabe marampara nama hita, Jadi ampara nama dohonongku tu hamu. Jala anggo tu joloan on, sai saut ma na tahatahon on.  Jadi taringot tu sinamot i Ampara :

Nungnga be takira, nungnga ta bilangi;

Nungnga be taida, ba patut ma tatimbangi.

Didok hamu sahali mangelekhon hamu di sinamot, hami songon boru sipanolopi do hami. Angkup ni i, songon sada boru naung leleng ahu di hula-hulanta on, boi do paboaonku tu amparangku,  Naburju do hula-hulanta on marboru, Ndada loason ni hulahulanta on ngalian boruna, pintor ulosanna do i, ai so diboto nasida mangkolit, ala ni i molo sahali mangido pe hamu unang ma hamu mangkolit, i ma umbahen na mardomu tu nasida hata ni umpasa :

Tubu andor ni gadong, jonok tu simarhalosi;

Holan sahali pe tu nasida hinunti sipanganon,

nga pitu hali iba diulosi.

Dihamu hulahulanami, hami songon boru sipanolopi do hami dinauli nadenggan, asa ro angka pansamotan dohot parhorasan tu hita tu joloan on. Botima.

21.     RP. NI PARBORU

Mauliate di hamu borunami, saonari hupasahat hami ma tu hamu dongan sahuta nami asa urupi jala tuturi hamu hami, ai hamu do na umbotosa hajut ni suhutnami.

22.     Hata sian Dongan Sahuta ni Parboru

Mauliate, gabe ma hita jala horas, hami pe dohononnami do hata saotik. Jala dohononku ma, ingkon masipaolo-oloan do na martondong jala masipaune-unean.

Aek godang, aek laut;

Dos ni roha do sibahen na saut

Ba, angkup ni i :

Sihingkit sinalenggam;

Ba, sai tapaune-une, asa dapot na dumenggan

On do dohonon nami tu hamu dongan sahuta nami, molo nungnga marsipaolo-oloan hamu hami pe songon dongan sahuta sipanolopi do hami diangka nauli nadenggan, Botima.

23.     RP. NI PARBORU

Mauliate di hamu dongan sahutanami, saonari sahat ma tu hita na mardongan tubu asa marsiaturan hita laho mangalehon pandapotta.

24.     Hata sian Dongan Tubu ni Parboru

Hamu Dongan Tubunami, dipangido amangborunta sian baribaan, asa sahali mangelekhon nasida di sinamot ni borunta, hami songon dongan tubu sahata ma hita  jala sipanolopi ma hami songon dongan tubu asa denggan ulaonta haduan., Botima.

25.     RP. NI PARBORU

Mauliate di hamu dongan tubunami, saonari hupangido hami ma panuturion sian hamu hulahula dohot tulangnami, hamu ma marsiaturan rajanami, botima.

26.     Hata sian Hulahula / Tulang ni Parboru

Hamu Raja ni parboruon ni borunami on. Didok hamu nangkin sahali mangelekhon ma hamu di sinamot jala didok hamu ndang tarbahen hamu mangalehon na godang, ala nungnga pogos hamu. Alai anggo dohononku, tung apala pogosmuna i ma nian mandorong hamu asa buas hamu mangalehon tu hulahulamuna, songon nidok ni umpasa :

Nidurung situma, laos dapot pora-pora;

Molo buas iba tu hulahula, na pogos hian iba gabe mamora.

Hami songon hulahula dohot tulang ni hulahula mu mangido nang pe sahali mandok hamu di sinamot alai godang ma pasahat hamu.

Tu hamu parboruonnami (diadophon ma dirina tu parboruonna, suhut parboru)  on ma dohononnami : Sude do angka na pamuli boru sai marsintahon asa dapot nian songon hata ni umpasa :

Marasar ma aili, ditoru bulung singkoru;

Sai naeng ma nian sihar panaili, hinorhon ni tuhor ni boru.

I ma alana umbahen na sai godang nian pinangido tuhor ni boruniba. Alai ndada sai sinamot na godang mambahen togu ni partondongon. Tupa do sipata ala ni balga ni sinamot gabe godang sipingkirhonon, songon nidok ni ompunta sijolo-jolo tubu :

Lam godang ni ula tano, lam godang ma Sipanganon;

Lam godang sinamot jinalo, lam godang ma sisarihonon.

Jadi dipangidoan ni  parboruonmuna na mangido asa sahali mangelekhon nasida di sinamot, hami pe songon hulahula dohot tulangmuna sipanolopi ma disaluhut nauli na denggan jala las do rohanami molo hamu marsipaolo-oloan. Ingot hamu ma hata ni umpasa :

Onggang marlatang, amporik marlipik;

Gabe do partuhor na godang, laos gabe do partuhor na otik.

Botima.

27.     RP. NI PARBORU

Mauliate ma dipanuturion muna hulahula dohot tulangnami. Dihamu amangboru, nungnga marliat-liat hami pasahathon panuturion, dipangidoanmuna na naeng sahali mangelekhon di sinamot. Nauli ma i amangboru alai godang ma pasahat hamu asa boi patupaonnami di ulaonta diari nanaeng ro asa sangap hami hulahulamu jala las rohamuna, botima.

28.     RP. NI PARANAK

Mauliate ma dihamu raja ni hulahulanami, Sinamot nanaeng pasahatonnami ima godangna Rp. . . . . . . . .  Rambu Pinudun/Sitombol artina ima sude. Alai anggota panandaion tu Suhi Ampang Naopat dohot Sisolhot godangna 5 (lima) panjouon diparade hami pe rajanami. Ianggo sifat ni pesta ima dialamannami (Taruhon Jual) / dialamanmu (Alap Jual) jala panjuhuti ima . . . . . . . . . .. Las ma rohamuna manjalo, ndang na mangkolit hami, ido pe na naboi tarpatupa hami, botima.

29.     RP. NI PARBORU

Horas ma jala gabe rajani pamoruon, nungga ditariashon hamu balga ni sinamot sisombahononmuna, ido tutu gabe do parsinamot na otik, gabe do parsinamot na godang. Alai nang pe songoni alapon do hata sian suhutnami.

Dihamu suhut sihabolonannami, pangidoan ni pamoruonta sian baribaan dielekkon nasida godang ni Sinamot ima Rp. . . . . . . . .  Rambu Pinudun/Sitombol artina ima sude. Alai anggota panandaion tu Suhi Ampang Naopat dohot Sisolhot godangna 5 (lima) panjouon diparade paranak. Jala sifat ni pesta ima dialaman nasida (Taruhon Jual) / dialamanta (Alap Jual) jala panjuhuti ima . . . . . . . . . ... Alai ndada ahu sibahen putusan, songon ni dok ni umpasa :

Lasiak na rara binahen tu panutuan,

Raja parhata pe au, sai suhut do sibaen putusan

Asa dok ma sian i, Botima.

30.     HATA SIAN SUHUT PARBORU

Olo, denggan do na nidok mi . . . . . . . . .,  paboa hamu ma tu nasida, jala ta oloi ma elek-elek nasida, mauliate.

31.     RP. NI PARBORU

Hamu raja ni borunami, ba nungnga uli rohanami manjalo na nidokmuna i, ima godang ni sinamot Rp. . . . . . . . . . . . ., panandaion tu Suhi Ampang Naopat dohot 5 tu sisolhotnami sai gabe ma hita jala horas. Jadi saonari pasahat hamu ma Bohi ni Sinamot. Jadi mangarade ma Suhut Parboru (Inanta boru Suhut Bolon mangarade ma, manarehon ulos tanda naung martondong, andorang so dipasahat suhut paranak tu suhut parboru jumolo dipataru boru ni paranak tu raja parhata ni parboru naeng mamilangi), Boan hamu ma tu son asa jolo hubilangi.

32.     RP. NI PARANAK

Mauliate Rajanami, gabe ma hita jala horas. Ia bohi ni sinamot na naeng pasahatonnami, godang na Rp. . . . . . . ., panggohina Rp.. . . . . . . pasahatonnami mai annon di pesta unjuk.

Jadi mangarade ma hamu suhut nami laho pasahathon bohi ni sinamot tu hulahulanta, jolo pasahat hamu tu parhata nasida asa dietong.

33.     RP. NI PARBORU

(RP. Ni Parboru mamilangi bohi ni sinamot andorang so dipasahat Suhut Paranak tu Suhut Parboru).

To ho do bohi ni Sinamot i Rp.. . . . . . . . . , pasahat hamu ma!.

34.     SUHUT PARBORU

(Suhut Paranak pasahat bohi ni Sinamot tu Suhut Parboru, dung dijalo, mandok hata ma Suhut Parboru tu Dongan Tubuna) : “Ahu pe na manjalo Sinamot on, na rap manjalo ma hita disi”.

35.     RP. NI PARBORU

Hamu Raja ni borunami, nungnga dijalo hami Bohi ni Sinamot, beha adong dope sipangidoonmuna, rade do hami mangalehon. Botima.

36.     RP. NI PARANAK

Adong dope Rajanami, Pangidoan, naeng ma nian sude hami ulosanmu, alai ulos na martohonan . . . . . .  lembar/bulung ma ulos herbang, tarmasuk ma i Ulos Pansamot dohot Ulos Hela. Jala na so dapot ulos herbang pasahat hamu ma ulos tinonun sadari.

37.     RP. NI PARBORU

Na uli, rade do hami,  ai lam godang si ulosan, tamba do sangap, jala tu na so dapot ulos herbang, tong do lehonon nami Ulos natinonun sadari, baen hamu ma annon daftarna.

38.     RP. NI PARANAK

Mauliate rajanami, partording ni ulaonta haduan hupasahat hami ma tu hamu rajanami, mauliate.

39.     RP. NI PARBORU

Mauliate amangboru, pasahat hamu ma haduan panandaion tu suhi ampang na opat dohot tu saluhut tutur nami.

40.     RP. NI PARANAK

Nauli rajanami, bahen hamu ma annon daftarna, mauliate.

41.     RP. NI PARBORU

Antong patorang hamu ma jolo partording ni ulaonta haduan, botima.

42.     RP. NI PARANAK

Songon konsep ni ulaonta haduan ima palaksanaan pesta unjuk, songonon ma :

a.        Sifat ni Pesta  TARUHON JUAL ima  Pesta dialaman ni Paranak dipatupai di . . . . . . . . . . . . . . . . .  tanggal . . . . . . . . . .  mulai pukul . . . . . . . mamang ALAP JUAL ima  Pesta dialaman ni Parboru dipatupai di . . . . . . . . . . . . . . . . .  tanggal . . . . . . . . . .  mulai pukul . . . . . . .

b.        Sibuhabuhai di Bagas ni Parboru di . . . . . . . . . . . , tanggal . . . . . . . . , mulai pukul . . . . . . . ..

c.        Pamasumasuon di . . . . . . . . . . . .,  tanggal . . . . . . . . ., pukul . . . . . . . .

d.        Penjuhuti/Sibuaton ima . . . . . . . . . . . . .

e.        Godang ni Sinamot Rp. . . . . . . . . (Rambu Pinudun/Sitombol), jala panandaion tu suhi ampang naopat dohot 5 panjouon tu sisolhot ni parboru  sian Paranak, bohi ni Sinamot naung dipasahat Rp.. . . . . ., panggohi ni sinamot Rp.. . . . di pesta unjuk dipasahat.

f.         Godang ni Ulos . . . . . . lembar/bulung termasuk ulos pansamot dohot ulos hela.

g.        Paranak dohot parboru pasahat Tintin Marangkup (2 banding 1)

j.         Parbue na pir sian Hulahula/Tulang ni Paranak tu . . . . . . . jala sian Hulahula/Tulang ni Parboru tu . . . . . . . .

h.        Ulos Tinonun Sadari diparade Paranak ma daftarna

i.         Parsitopot balatuknabe (marsipasangap hulahula/tuangna be)

j.         Torop ni Undangan      . . . . sian Parboru . . . . sian paranak

k.        Panomunomuon tu angka tutur sesuai ma dohot na somal (Kesepakatan di Makassar)

l.         Pambagian Jambar di Pesta unjuk Jambar Mangihut

m.      Mobil penganten, dokumentasi dohot parmusik di pesta unjuk sian . . . . . . .

n.        Ulaon Sadari (boi diulahon boi ndang diulahon, jala Marsihol-sihol ma dominan (sesuai ma kesepakatan ni suhut)

43.     RP. NI PARBORU

Nauli mai amangboru, andorang so masuk hita tu acara Manauri/Hata Sigabe-gabe/Hata pasu-pasu, denggan do dijahahon Dongan Sahutanami dohot dongan sahutamuna songon butir-butir ni pangkataion disadari on. Tu hamu Dongan Sahutanami, jahahon hamu ma jolo songon butir-butir ni pangkataionta sadari on.

44.     DONGAN SAHUTA NI PARBORU / PARANAK

Mauliate, hujahahon hami ma songon butir-butir ni pangkataionta disadari on, ima (dijahahon ma sesuai kesepakatan naung diputushon).

a.        Sifat ni Pesta  TARUHON JUAL ima  Pesta dialaman ni Paranak dipatupai di . . . . . . . . . . . . . . . . .  tanggal . . . . . . . . . .  mulai pukul . . . . . . . mamang ALAP JUAL ima  Pesta dialaman ni Parboru dipatupai di . . . . . . . . . . . . . . . . .  tanggal . . . . . . . . . .  mulai pukul . . . . . . .

b.        Sibuhabuhai di Bagas ni Parboru di . . . . . . . . . . . , tanggal . . . . . . . . , mulai pukul . . . . . . . ..

c.        Pamasumasuon di . . . . . . . . . . . .,  tanggal . . . . . . . . ., pukul . . . . . . . .

d.        Penjuhuti/Sibuaton ima . . . . . . . . . . . . .

e.        Godang ni Sinamot Rp. . . . . . . . . (Rambu Pinudun/Sitombol), jala panandaion tu suhi ampang naopat dohot 5 panjouon tu sisolhot ni parboru  sian Paranak, bohi ni Sinamot naung dipasahat Rp.. . . . . ., panggohi ni sinamot Rp.. . . . di pesta unjuk dipasahat.

f.         Godang ni Ulos . . . . . . lembar/bulung termasuk ulos pansamot dohot ulos hela.

g.        Paranak dohot parboru pasahat Tintin Marangkup (2 banding 1)

h.        Parbue na pir sian Hulahula/Tulang ni Paranak tu . . . . . . . jala sian Hulahula/Tulang ni Parboru tu . . . . . . . .

i.         Ulos Tinonun Sadari diparade Paranak ma daftarna

a.        Parsitopot balatuknabe (marsipasangap hulahula/tuangna be)

j.         Torop ni Undangan     . . . . sian Parboru . . . . sian paranak

k.        Panomunomuon tu angka tutur sesuai ma dohot na somal (Kesepakatan di Makassar)

l.         Pambagian Jambar di Pesta unjuk Jambar Mangihut

m.      Mobil penganten, dokumentasi dohot parmusik di pesta unjuk sian . . . . . . .

n.        Ulaon Sadari: Marsihol-sihol (sesuai ma kesepakatan ni suhut)

Botima.

k.        RP. NI PARANAK

Molo adong na hurang lobi na dijahahon ni dongan sahuta,  patingkos hamu hami Rajanami, Botima.

l.          RP. NI PARBORU

Mauliate, nungnga dimpos be saluhutna, Botima.

V. ACARA MANAURI

1.           RP. NI PARBORU

Masuk ma hita tu acara terakhir, ima Acara MANAURI/Hata Sigabe-gabe/Hata Pasu-pasu.

Molo satolop hita, ala marningot tingki, songon on ma nian :

a.        Sahalak ma sian horong ni Hula-hula/Tulang, dungi mangampu ma suhut.

b.       Taripar ma tu Paranak, nanaeng mangampu.

2.           RP. NI PARANAK

Nauli jala denggan ma i Rajanami.

A.   Sian PARBORU

1.   Hula-hula  (Tulang ni Boru Oroan)

Gabe ma hita jala horas, tadok mauliate tu Amanta Debata na mandongani hita sadarion. Nungnga marsipaunduhan hamu jala masipaoloan di angka nanaeng patupaonmuna. Sisada uli nama hamu na dua hasuhuton di ulaon on, jala sisada gora.

Dibahen i, sai masiamin-aminan ma hamu di ulaon on, songon lampak ni gaol, jala masitungkol-tongkolan songon suhat di robean.

Taringot anak dohot boru na tahatai sadaarion, ba on ma dohonongku, ba sai marrongkap ma nasida Jala :

Balintang ma pagabe, tumandangkon sitadoan

Arimuna ma gabe, ala nungnga hamu masipaolo-oloan

2.   Mangampu SUHUT PARBORU

·         Mauliate tadok tu Tuhanta, ala denggan mardalan ulaonta dibagasan sadari on.

·         Mauliate nang tu Dongan Tubu, Boru, Bere, Dongan Sahuta, lumobi Hula-hula . . . . . . . . ., Tulang nami . . . . . . . dohot Tulang Rorobotnami . . . . . . . . , Tuhanta ma na mambaloshon marlipat ganda dihamu, Na hurang lobi panjalo nami manganju ma hamu.

·         Tu Borunami Rajai Raja . . . . . . . .  rap dohot uduranna, Rap martangiang ma hita Lae, Ito, Amangboru, anggiat sude na tahatai i, dipasu-pasu Tuhanta. Di namulak pe hamu, Tuhanta na mandongani dipardalanan, hipas sahat tu tujuan.

Horas ma dihita sude. !!!

B.   Sian PARANAK

Mangampu SUHUT PARANAK

o    Mauliate di Tuhanta, renta jala une ulaonta dibagasan dame dohot las ni roha, sudena I ndang alani gogonta, holan asi dohot basa ni Tuhan I do.

o    Mauliate ma pasahatonku tu sude Dongan Tubu, Boru dohot Bere, Dongan Sahuta dohot Ale-ale, tarlumobi Hula-hula nami rajai Raja . . . . . . . . . , Tulang rajai . . . . . . . . . .  dohot Tulang Rorobot rajai . . . . . . . . ., sai Tuhanta ma mandongani hita saluhutna.

o    Tu Rajanami . . . . . . . . .  rap dohot uduranna, mauliate ma dipanjalomuna, Lambok jala minar, hata nauli, Pasu-pasumuna I, asima roha ni Tuhanta dipasaut ma i.

Tinampul bulung sabi, lompan ni pangula

Sahat ma pasu-pasu ni lehonmuna, Horas ma hamu hulahula.

Horas jala gabe ma hita sude. !!

3.           RP. NI PARBORU

Dihamu parboruon nami, ala naung sun ulaonta, asa diingot angka situan natorop di ulaonta i, ba pasahat hamu ma ingot-ingot.

(Somalna, gumodang sian paranak, dung ditaruhon suruan ni Paranak  tu horong  ni Parboru, laos margabung ma dohot ingot-ingot na sian parboru, Jala Parhata ni Parboru ma pasahathon tu sahalak Dongan Sahuta ni nadua bola pihak. Ingot-ingot na sian paranak dibagihon tu horong ni parboru, jala nasian parboru tu paranak, dung jolo adong hata pangantar sian dongan sahuta ni parboru).

Hata huhuasi ingot-ingot sian dongan sahuta ni Parboru /Paranak :

Gabe ma hita jala horas. Parjolo ma tadok mauliate tu Amanta parasirohai, na mandongani hita di ulaon sadarion.

“Ai nungnga jumpang tali apsa, bahen ihot ni ogung oloan;

Nungnga denggan marujung hata, jala masipaolo-oloan”

Hamu hasuhuton nadua, godang dope siulaonta, jadi sai masiamin-aminan ma hamu, songon lampak ni gaol, jala masitungkol-tungkolan songon suhat di robean. Taringot anak dohot boru i, sai marrongkap ma nasida, sai martomu ma nasida songon buhu tu ruas, jala tu hita saluhutna dohonongku ma :

Andoras ma tu andoris, tu andor ni purbatua;

Rap horas ma hita rap torkis, di na mulak be hita tu jabunta.

Botima.

(Dungi dipambagihon ma hepeng i, dung sun dibagi laos didok ma): Ingot-ingot=3 x)

4.           TANGIANG PANUTUP SIAN PARBORU (Hulahula)

5.           MARSIJALANGAN (Selesai)